雖然距離下屆2022年特首選舉仲有三年幾時間，但政圈已傳出林鄭月娥連任機會大，連行會召集人陳智思亦公開話唔會選特首，力撐娥特再選。
北京出席政協會議
而一班大孖沙中，信置主席黃志祥早前已經急不及待搶先表態，除咗同其他大孖沙取態不一，力撐林鄭局部收回粉嶺高球場建屋，仲無限loop話「一定支持」林鄭連任，甚至豎埋手指公大讚：「佢係最好嘅！」可以話係瞓身支持。
不過暫時除黃志祥外，八方未見其他大孖沙跟隊開腔表態撐林鄭，似乎經歷當年唐梁之爭，仲有689以為篤定連任，點知忽然換咗娥特，佢哋發現都係靜觀其變最穩陣，就好似同為全國政協常委嘅長和系主席李澤鉅同恒地副主席李家傑噚日喺北京出席全國政協會議時，雙雙拒評會否支持林鄭連任特首。
其實睇返上屆特首選委會，長和系喺各界別手握約九票，恒地則至少有六票，兩大財團對特首人選點都有多少影響力，最近盛傳林鄭即將推出一手樓空置稅，肯定對佢哋啲地產生意有影響，再加埋之前嘅高球場風波，大孖沙下屆再落注林鄭前，究竟真係要「停一停、諗一諗」，定係怕太早押錯注第日要轉身會好尷尬呢？