向律師W請教完「逃犯修例」修訂之後，知道商界人士最怕受到牽連，被引渡返大陸受審、坐監，咁就苦不堪言。過往內地對付一啲膽敢批評、揭露政府內幕嘅記者，不時受到「經濟犯罪」調查，所謂犯罪手法，不知是真還是假，總之十次有十次，被調查嘅編輯一定冇運行，近來又有一位崔名嘴爆法庭檔案內幕，不知犯了甚麼「罪」，暫時不見蹤影咯喎！一言以蔽之，內地叫口號「依法治國」，但個「法」字只有黨中央可以詮釋，黨規大於法規，平時只講搵銀，不講政治嘅香港商人點會唔驚。
講講吓，見到醫生C嚟到飲茶，啱啱右手中指痛症發作，連忙向醫生C抽水，請佢望一望，醫生C執住左丁山右中指向上一拉，跟住一按中指下之手掌肌肉，左丁山當堂痛到呀一聲，醫生C話：「係彈弓手嘞，飲完茶嚟我度打支針。」
右中指不能伸放自如，朝早起床一定痛，已近兩個月，在沙田馬會碰到梁秉中教授，佢話試下物理治療，在會所入口櫃枱留下一隻小膠波（GSK贈品），叫左丁山一路行街一路用右手揸波，波仔上印咗兩行字：「骨骼健康從運動、高鈣飲食及定期檢查開始。」明白嘅，但這世界充滿矛盾，一位老友嘅千金產子後兩年，竟然生膽石，要割膽，好彩現在微創手術好神奇，佢割膽後兩日已經可以返工，但三十零歲就要割膽，總係唔抵，原因係乜呀，就是在懷孕期間及產後，吃高鈣食物太多，搞到膽生石喎！
吃飯過後，行街一陣就去到醫生C嘅萬邦大廈診所，以前佢在德成大廈，但德成即將拆卸，所有醫生搬走，令中環出現醫務所供應不足情況，業主梗係乘機加租啦，醫生C現時醫務所面積比以前細兩成，但佢話月租就比以前高出兩成！此或是中環醫生診金特別貴之原因，前星期左丁山去驗牙，見咗牙醫3分鐘，照一張X光片，跟住被refer去睇專家，咁就盛惠一千三百元，同一時間，沙田陳太孫女牙痛，帶去禾輋睇牙醫，check咗一輪話冇乜事，診金係100蚊，冇錯，係一百元！
醫生C就係老一派醫生，收費有節制，房間不設電腦，只用紙筆，佢話：「我啲年青同行個個對住電腦，病人講嘢，醫生將有關資料打入電腦，雙方缺少眼神接觸，我就係要望住病人講，所以唔要電腦。」佢同左丁山在右手中指下打針，自問捱得痛嘅左丁山，都要開口哼幾句哎吔吔，因為未試過打針咁痛也。彈弓手係乜成因，醫生C話：「打機、打電腦、打手機無節制，打麻將捽牌都會引致右手手筋發炎。」左丁山樣樣都冇喎，醫生C話：「你寫稿太耐呢，寫專欄都二十幾年啦。」