重劍女將江旻憓日前於布達佩斯大獎賽32強爆冷止步，不過她受惠競爭對手去年積分逾期，得嘗世界第一滋味。江旻憓周二下午「無冕」返港，面對來訪傳媒，她五味雜陳，一提上仗失準即哭成淚人，連說「排名反映唔到實力」，只盼未來能以表現證明自己配得上一姐之位。
記者：洪量丰
攝影：何家達
25歲的江旻憓今季勢如破竹，於古巴和巴塞隆拿站世界盃連下兩城，上月世界排名一舉由第7升至第2，雖然江旻憓於布達佩斯大獎賽32強不敵16歲的東道主劍手早早下馬，積分維持不變，惟原一姐拿華利雅去年所得積分逾期，造就江旻憓以163分榮登世界第1。
教練痛斥「唔識打劍」
日夜苦練終站上夢寐以求的世界之巔，江旻憓反哽咽連說自己不配成一姐，「我覺得我配唔上，打得唔好，要更努力先保持到。打得咁差好失望，我離心目中世界第一水平差好遠，有好多嘢要練。」她不滿自己狀態飄忽，每次奪冠後的賽事總是「發夢」，「好唔開心冇從錯誤中學習，上次亞錦賽攞金牌世錦賽又發夢，古巴打完到多哈又發夢，今次係三次喇。」雖榮升第一，但江旻憓卻透露教練Tavi對其慢熱表現極光火，「今次係好好嘅教訓，排名反映唔到實力，教練好嬲，佢話排名係『nothing』，話我唔識打劍，打成咁樣！」
要向彭斯古學練穩定性
江旻憓坦言排名如無形壓力，冀重拾年前克服左膝十字韌帶斷裂後重返賽場時享受劍擊的初心，「其實我唔應該理排名同分，上到第一心情好奇怪，記得受傷後我好珍惜同享受有得打，𠵱家好番就反而諗排名，想要好成績。」
成都站世界盃將於本月尾舉行，一場比賽過後榜上排名隨時又是另一番光景。江旻憓期待能學世界第三、羅馬尼亞劍手彭斯古的從容與穩定，「佢好清楚自己同對手做緊咩，又控制到自己；我唔可以次次都係咁，我真係要努力練，做好自己。」
江旻憓啟蒙教練陳偉勁昨專程到機場迎接高足，並讚她刻苦堅毅，「佢非常努力，我做劍手都自愧不如。佢去到史丹福大學時學校得佩劍同花劍教練，我試過同佢打電話教劍，但佢真係好努力，讀書好忙，日日瞓幾個鐘就去練劍。」他指江旻憓打劍轉換敏捷，又有手長優勢，而且近月越來越強壯，「佢打劍好優雅，呢一年明顯強壯好多。」陳sir認為劍手維持世界第一壓力大，期望她放鬆心情比賽。
本報訊