因為暴動罪被判囚七年嘅盧建民，最近引發前特首、全國政協副主席梁振英嘅高度關注，皆因盧建民早前向《蘋果日報》副社長陳沛敏發出賀年卡，並獲陳回信，689即時如獲至寶咁款，喺fb鬧《蘋果》為暴徒加油打氣。
寄卡給《蘋果》 被上綱上線
可能都係不平則鳴，盧建民嘅fb專頁「影攝食」噚日上載咗佢喺上月15日「回梁振英的信」，盧建民信中提到自己不過係寄封賀年卡畀陳沛敏，竟被梁上綱上線，「似文革到來之象，究竟我的朋友和本人得罪閣下邊度？」佢話賀卡無非帶出一個訊息，就係在囚人士都係有血有肉，社會應該多加關注而唔係不聞不問。
盧建民繼而指旺角騷亂正正係梁振英在任特首時政策失當而起，重提689收咗UGL公司5,000萬，佢認為如果呢件事喺歐美發生，梁「一早就坐牢啦！還有時間給閣下在外面談笑風生嗎？」最後仲向689送上「祝福」，「本人都祝梁先生，早日入獄，赤柱還有位，本人等你入來！」
廉署去年底宣佈完成UGL案調查，徵詢律政司意見，律政司冇尋求獨立法律意見已拍板，認為冇足夠證據向梁振英提出檢控而達致合理機會定罪，八方相信689唔會同意盧建民講法，全國政協會議正在北京舉行，689會點回應呢？
李八方