全名政策創新與統籌辦事處嘅創新辦，稱得上係娥特嘅baby。身為創新辦總監嘅馮程淑儀，噚日率領三位副總監同埋一班後生嘅前線同事同傳媒茶敍，順便畀大家睇吓相當「創新」嘅創新辦辦公室。
八方親身睇過，的確唔似一般衙門。政總對正維港，創新辦又位處高層，窗口位梗係留畀領導們。以前中策組首席顧問邵善波間房就坐擁維港景。不過創新辦就解放咗間房嚟做茶水間。辦公室幾創新都好，都要政治正確，例如某處書架上放咗三本《大珠三角洲與中國的崛起》，同埋三本《The Greater Pearl River Delta and The Rise of China》。點解同一本書要咁多本？或者因為呢兩本書嘅作者都係利豐研究中心董事總經理張家敏囉，亦即係前排九西補選捐錢畀馮檢基嗰位前全國政協！