一名身穿全身藍色緊身衣男子，噚日朝9點幾現身立法會宴會廳，不時作出按壓他人心口手勢，唔通就係傳聞中嘅「任何仁」？原來任何仁同消防處噚日喺立法會搞訓練講座，教授立會議員「自救」知識。
洗腦歌下閉門練
最早到場，就係經常喺立法會上瞓到好似有生命危險嘅民建聯「象哥」黃定光！第二個到場嘅就係立法會主席梁君彥。民主派則有人民力量慢必陳志全同教育界議員葉建源現身上堂。象哥到場後問梁君彥，係咪會親自示範俾人急救？梁笑騎騎話示範唔緊要，但叫象哥要幫佢做埋人工呼吸！象哥聽到即時縮沙，話自己有傷風未清，叫梁君彥唔好搞佢！
全場焦點當然係活動前約半小時已喺宴會廳綵排嘅任何仁，不過任何仁僅留咗兩分鐘，八方無緣睇佢示範急救。任何仁之後重返宴會廳，閉門同一班議員喺強勁任何仁洗腦歌下齊齊練習搓心口。消防處處長李建日話噚日主要教議員識滅火、識自救同識逃生，包括教做心肺復蘇同用心臟除顫器，因為心臟病發呢個症狀真係爭分奪秒，立會有九部心臟除顫器，希望個個人學識後，都可以變身任何仁。
李八方