呢個世代乜都講學歷、資歷，連負責執法嘅紀律部隊亦與時並進，香港海關去年12月通過香港學術及職業資歷評審局嘅評審，成功將海關督察級及關員級嘅入職課程納入「資歷名冊」內，係繼警隊後，本港第二支同時為員佐級及主任級人員提供資歷架構認可入職課程嘅紀律部隊。
由今年1月1日起受訓並完成課程嘅海關見習督察同見習關員將分別獲頒「海關管理專業文憑」及「海關關務專業文憑」，前者相當於本地學士學位嘅資歷，後者屬副學士學位或高級文憑嘅資歷，首批獲頒認可資歷嘅見習督察及見習關員分別有64人及124人。海關關長鄧以海話，香港海關學院將進一步同大專院校合作，研究學分減免，鼓勵海關人員持續進修，達致終身學習嘅目標。