農曆新「豬」年，親戚友好團拜，自不免會「豬」事八卦一番，而「港豬」嘅搞笑嘢，可能都係大家剝瓜子時嘅熱門話題。查實網上熱論嘅「港豬」，到底有啲乜嘢特質？做「港豬」又有乜嘢問題？八方搵咗幾位生肖屬豬嘅議員問一番，竟然有啲「豬議員」，唔知近年大熱嘅「港豬」係乜東東。
李國麟黃碧雲唔識港豬
立法會肖豬嘅議員數埋五隻手指都唔夠，當中最資深嘅係衞生服務界李國麟同民主黨黃碧雲，但原來兩位「登六」（年屆60歲）豬議員，不知「港豬」為何物！喺勞福局局長羅致光標準下只算「中年」嘅李國麟，更加直言聽都未聽過，佢仲相當坦白咁講：「我哋呢啲『阿伯』，登六嘅真係唔識喎！」黃碧雲就估「港豬」嘅意思：「係咪講啲人『嘟（讀音麻煩低一啲）』啲呢？即係好不求甚解咁樣。」
既然「中豬」唔多識甚麼是「港豬」，八方就問吓今年48歲嘅「港豬」、公民黨陳淑莊Tanya啦！Tanya好學術咁話，「港豬」就係嗰啲「其實有足夠嘅智商同學術智識，但係又要唔過問、唔理、話之佢，（以為）某樣嘢就會消失或者不存在咁樣」。根據香港網絡大典記載，「港豬」係指嗰啲以「搵食」、以「為頭家」做藉口而不理社會問題嘅人，呢啲人被認為同豬一樣咁蠢，只係關心食同瞓，所以得名「港豬」。Tanya果然同網絡世界接軌！佢話自己身邊嘅「港豬」唔多，相反人人都㷫烚烚，因今時今日嘅政府總有一件事可以撩㷫人，想做「港豬」都難。
喺新春佳節，三位豬議員都同大家拜年，祝大家「豬」事順利，高官切忌「豬」多事幹，香港嘅核心價值唔好因此付「豬」東流，Tanya特別提醒「港豬」唔好再匿埋做鴕鳥，因為你唔理政治，政治就會嚟搵你，年底區選，記得去投票。
李八方