周汶錡（Kathy）有兩子萬事足，肖虎的她今年破太歲都不想計劃生豬B沖喜擋煞。三母子日前一起整曲奇，兩兄弟分工合作，出爐時細佬吃不停。
採訪：梁錦雯
攝影：林德雄
周汶錡與法籍老公Julien育有兩名可愛混血囝囝、三歲半大仔雷棨宇（Jacques）與快將兩歲的細仔雷棨博（Avner），日前她與兩名「小情人」接受訪問，三母子親子樂學整豬樣、大吉、元寶曲奇。
兩位小朋友都是入廚小初哥，Avner由導師Crystal Wong指導下，用麵粉棍搓曲奇粉糰，之後與哥哥印模，Kathy負責擺入焗爐焗曲奇，最後埋門由Jacques負責畫豬仔、大吉糖霜裝飾。身為大哥的Jacques指令弟弟不要偷食，不過Avner一於懶理，不停猛食，更向媽咪說：「Hungry」。
打開全盒發光
提到新年，Kathy笑言有了兩個仔更愛這個節日，重溫兒時的習俗：「細細個都係我搞全盒，將自己鍾意食嘅糖同媽咪去買，𠵱家全盒基本上買啲小朋友可以食到嘅糖，佢哋一開就好似我哋以前見到銀行簿仔一樣，發光，朱古力行先！」
Kathy透露會與囝囝體驗習俗：「好似行花市，𠵱家佢哋做到嘅嘢，例如入錢封利是，會畀佢哋試，暫時搞破壞嘅嘢就唔會，佢哋會睇住個全盒幾時會開。」提到兒子的利是錢如何處理，她說：「幫佢哋儲起利是錢，我以前細個利是錢媽咪攞晒，𠵱家佢哋利是、生日，我幫佢哋做啲慈善，幫佢哋助學。」
催胞妹生BB
屬虎的Kathy在豬年破太歲，她謂會拜神祈求平安，問到會否追個豬BB，她即耍手：「未考慮住，唔使，食吓豬餅就得啦。」問到會否催新婚的妹妹周勵淇快點生豬B，她即笑言：「會，熱鬧啲，催佢快啲，我妹應該快啲，可以同佢哋一齊玩。」新年願望，她則希望囝囝身體健康，笑言不要太快「快高長大」：「佢哋大得太快，由抱住到𠵱家走嚟走去，太快，時光飛逝，開開心心最緊要。」
場地提供：Cooktown X Fisher & Paykel Social Kitchen