周三西盃四強首回合上演國家打吡，巴塞隆拿賽前話為慶祝農曆新年，今場會着印咗簡體字球員名嘅波衫（左圖），但因為西班牙足總介入，結果只可以賽前着，比賽就要着番正常衫，大家唔可以喺場上見到梅西（美斯）同庫蒂尼奧（菲臘比古天奴），唔知一眾中國球迷失唔失望喇。
講番場波，有傷嘅美斯先做後備，結果巴塞六分鐘就失波，皇馬18歲小將雲尼斯奧斯祖利亞左路橫傳賓施馬，後者再助攻盧卡斯華斯基斯射入，落後嘅巴塞雖然全力反撲，但上半場就射唔爆基羅拿華斯；下半場巴塞喺門前一輪混戰，最後由頂替美斯踢正選嘅馬爾甘補射得手，幫巴塞追成1:1，不過兩隊之後再冇波入，留番次回合再砌過。