英國BBC報道，法甲球會南特已經向英超球會卡迪夫城追數，要卡城喺10日之內，清咗早前因空難失蹤、阿根廷前鋒伊美利安奴沙拿高達1,500萬鎊（約1.5億港元）轉會費條數，唔係就會採取法律行動咁話。卡城方面就話佢哋將會履行合約，但要搞清楚所有嘢先會科水，目前就扣起咗第一筆錢，又表示對南特家陣提出咁嘅要求感到驚訝，特別係目前卡城正同當局聯繫緊，因為已經發現飛機殘骸有具屍體，但就要先確認身份。報道仲話，兩間球會早前嘅協議係1,500萬鎊喺3年內分期科水，沙拿嘅前球會波爾多都有權分賬50%。事件曝光後，英國網民反應都係差唔多，普遍認為卡城係要科水嘅，不過又覺得南特唔應該家陣追數，仲有網民表示希望收到嘅消息唔係轉會費問題，而係兩間球會合作，幫沙拿同機師家屬籌集慰問金。