曼城重上英超榜首！禮拜三英超，曼城作客贏愛華頓2:0，踢多場之下靠得失球差壓過同分嘅利物浦上榜首，領隊哥迪奧拿就風騷喇，仲話曼城可以收復最多七分嘅失地，係運動員嘅典範。
後備耶穌仔入波食拖肥
曼城今場踢得唔係好，不過上下半場補時各入一球，先有拿樸迪接應大衛施華嘅罰球頂入，完場前由一對後備孖寶建功，奇雲迪布尼靚傳加比爾捷西斯，後者單刀之下，雖然「拖肥」門將比克福特都救到第一吓，但「耶穌仔」加多頭補中，曼城就咁有驚無險贏兩球，追到同踢少場嘅利物浦同分，但以得失球差領先七球升上榜首。
曼城上年底喺聖誕快車連輸兩場，一度落後紅軍七分，家陣總算收復失地，事關佢哋2019年6場英超5勝1負表現夠穩，最緊要一場係主場2:1贏紅軍，哥帥就好開心咁話︰「1個月前我哋可能落後10分，然後6、7日前落後7分，但家陣我哋已經喺榜首，呢個故事教訓就係永不放棄，呢個係對所有運動員最好嘅忠告。」
曼城兩日後英超主場惡鬥車路士，哥帥就話當決賽咁踢；至於今場耶穌仔拎到佢19年各賽事嘅第9個入球，而且只係要49.25分鐘就入一球，已經全面復蘇，哥帥就梗係開心：「佢最近入咗九球，對球隊非常重要，同阿古路一樣，我哋需要佢嘅入球效率。」另外愛華頓都算幫得手，今場將首次席射手李察利臣同基菲爾施古臣擺後備，有網民就批評愛華頓唔想同市宿敵利物浦贏英超，所以放水咁話。
月尾雙紅會米拿未驚過
不過利物浦其實家陣仲有爭標主導權喺手，數字上都係英超失分最少嘅球隊，講到尾紅軍最大敵人唔係「藍月」，而係自己可唔可以喺狀態同踢法上調節到，喺每場均勢嘅波有堅持拎晒三分嘅韌力。當務之急，就梗係聽日主場對般尼茅夫要重上勝軌，而關鍵就係月尾作客曼聯嘅雙紅會，若然紅軍可以一舉撐過呢兩場波，相信低潮可以結束，好似老大哥、陣中唯一有贏英超經驗嘅占士米拿話齋：「擔心？你問我二月排榜首會唔會擔心？唔會喎，我好開心就真。」