幾年來，經常在報紙睇到「話語權」呢個名詞。左丁山不學無術，成日以為「話語權」即是「話事權」嘅文雅版，我有權咪話事囉，美國在美洲話事百幾年，委內瑞拉發生事故，物先腐然後蟲生，馬杜羅搞到國家經濟破產，美國於是乘機發揮「話事權」，承認反對派自封為總統，共產黨在中國大陸有全面話事權，邊個爭取維權就要坐監，現在搞到昔日大紅人周永康之媳婦亦要「維權」，可見中共話事權之偉大。
2月3日在家閱讀崇基師弟梁文道嘅大作「真理只是實力的結果」，又學到嘢。梁文道可能係四分一世紀以來讀書最勤力嘅中大畢業生，篇篇文章都長篇大論，引經據典，左丁山讀之當上堂補課。佢今次講到中國爭取「話語權」，從甚麼安陽師範學院威過哈佛大學講起……談及話語權，先至知道power of discourse，源自福柯，「知識就是權力」，現在中國要爭取國際話語權，政治話語權，中國歷史話語權，例如「牢牢把握清史研究話語權」。
得唔得呢？好難咯，中國知識分子、讀書人、留學生，只要一日不放棄共產黨語言：「社會主義優越性與黨的英明領導分不開」，而以黨領導人思想先行，預設社會、文化、歷史研究立場，休想在國際知識界取得話語權。教育、思想、人文學術研究唔係用錢就可以堆砌出嚟嘅，發射火箭登陸月球背面就得，可惜人類嘅思想思維複雜過月球表面地質呢。
到目前為止，中國看來最懂得用銀紙取得話事權而不是話語權。2017年秋天，一間中國教育公司（牟利）Kaiwen Education（凱文教育）向美國新澤西州普林斯頓一間小型音樂學院（Westminster Choir College）提出收購建議，被全資股東Rider University接納，收購價係5千6百萬美元，其中4千萬付予Rider，另外1千6百萬用於更新改善聲樂學院之校舍設備及課程。Rider想賣呢間學校，但美國冇人問津，突然間收到中國「凱文」現金收購，自然喜出望外。但「凱文」是甚麼公司？收購建議公開後，聲樂學院的校友組織上網搜尋，最後得悉凱文的最終控股公司就是一家中國國營企業，專營大橋鋼鐵建材，中國牟利國企為何看中了一間只有四百名學生的百年老店、連年虧損的Westminster？用意不明，於是該學院的校友組織在2018年10月，向法院入稟阻止這宗收購，令到特朗普喜愛的霍士新聞連番報導，攻擊中國企業滲透美國教育界！