海關一向予人感覺都係男人天下，至今只有「一哥」未出過「一姐」，呢嗰局面或會被打破，原海關助理關長何珮珊（圖）今年1月獲晉升為海關副關長，係海關首位最高級女性官員，佢更有可能將來接替鄧以海，成為海關首位女關長，有望成為1996年出任入境處處長嘅葉劉淑儀之後，另一位紀律部隊女性首長。
海關關長鄧以海噚日喺2018年度總結海關執法記者會上話，對於有首次女性出任副關長，係海關成立110年嚟嘅驕傲。至於Madam何會否再下一城，成為海關首位「一姐」？鄧以海話政府晉升官員一直以經驗、領導才能同潛質為先，亦會考慮優先從內部晉升，性別唔會亦唔應該係不利因素。Madam何就話現時唯一目標係要協助關長帶領及管理部門，共同面對未來挑戰。
91年加入海關嘅何珮珊曾帶隊打擊走私奶粉活動，佢丈夫就係現任入境處處長曾國衞，曾Sir曾透露，二人係喺借調到保安局工作時相識，07年結婚。