法甲老牌球會摩納哥今季認真大鑊，雖然球隊近期又增兵又換帥，不過成績依然冇乜起色，上個禮拜六法甲喺主場被斯特拉斯堡狂炒5:1繼續深陷降班漩渦，教練亨利忍唔住嬲到要問候對方球員嘅屋企人。到周二法足盃繼續冇起色，再喺主場出擊又係輸波收場，1:3不敵梅斯出局。
摩納哥場場被炒致失控
早幾年仲係富豪球會嘅摩納哥今季瘋狂星散，法賓奴泰華利斯、基達巴迪爾、湯馬士林馬同摩天奴等等踢得之人全部走晒，搞到球隊要搵班預備組球員上嚟踢。雖然球隊早排搵咗法國名宿亨利返嚟執教，亨利今個月又搵咗佢阿仙奴嘅師弟法比加斯幫手，不過成績都係冇乜起色，𠵱家繼續排喺聯賽尾二。
摩納哥喺上個禮拜六嘅聯賽主場對斯特拉斯堡，球隊喺比賽早段打少一人嘅情況下，半場落後1:2，喺呢個時候，亨利要爆喇。當比賽去到43分鐘，亨利因為不滿對方後衞堅尼拿拉拖延時間，喺場邊破口大罵，仲侮辱堅尼拿拉個阿嫲係妓女。不過亨利咁躁都解決唔到問題嘅，摩納哥呢場最後都係要慘敗1:5。
亨利賽後就為自己嘅言論解釋同道歉，指自己唔係想侮辱對手，只係球證執法不公先令佢失去理智咁話：「嗰句說話只係我一時情急之下嘅反應，我為此感到後悔。我只係一個普通人，因為受到一連串嘅事先影響到情緒。喺今場比賽中，助理球證曾經通知過球證四次對手係有犯規，不過球證並冇理會，呢件事真係令我好沮喪。」
PSG涉收集種族資料被罰
不過令到亨利更沮喪嘅事陸續有嚟，摩納哥喺禮拜二嘅法國足總盃又輸一仗，主場以1:3不敵梅斯。雖然摩納哥今場都算精銳盡出，法卡奧、泰利文斯同法比加斯都有落場，其中法卡奧仲射入一球，不過最後都係難逃出局命運。
另一支法國富豪球會巴黎聖日耳門（PSG）最近都鬧出醜聞，去年底就有法國傳媒揭發PSG喺2013年至今，負責青訓嘅球探會喺球員嘅評估當中加入種族同血統等資訊。有曾經效力PSG嘅球探亦向傳媒爆料，指球會唔想招募太多黑人球員。法甲聯賽紀律委員會日前就裁定PSG收集嘅資訊違反法國法律，決定向球會罰款10萬歐元。不過委員會亦指出，雖然PSG嘅行為違法，不過無證據顯示球會收集呢啲資料同篩選球員或涉種族歧視有關。