政府派四千蚊，豪擲110億到底你有冇份？香港人，無論係咪個個都係好人，有人塞錢入你袋而對方唔係幣少，點會嫌錢腥。但收錢要好多條件符合，年滿18歲的廢青最爽，閉起雙眼就可以將四千蚊手到拿來。四張金牛，夠坐廉航玩日本，劉富貴公子眼見廢青有錢就身痕，肯定唔like，忍唔到口，指責廢青一邊撐自決，一邊袋袋平安，無道德。係呀，身體最誠實，犯法嗎？我都想拎四千銀，學林鄭闊太咁款去工展會做騷辦年貨。但事實擺到明，我唔符合共享，只能自己的臘味自己找數。
四千蚊益280萬人，盡慷納稅人之慨。但唔少港豬媽媽聲，指第一天派表格，觀塘民政署竟然半日已經「缺貨」。「貴」為全港十八區最貧之地，觀塘冇深水埗明哥駐場，殯儀之星陳健康也不會跨區幫手抓表格，觀塘友無表一身愁，只能依靠民X聯借表，個人資料瞬間轉移，七日唔夠就收到「限制出境」或「順豐郵包違規」的電騙來電，食得鹹魚抵得渴，無謂申訴了。政府擲110億將280萬港豬私隱一剔過收歸國有，值得啦。有市民大罵申請手續「馬交朋友」，其實呢，成功申請後私隱速遞西環，市民到時驚呼呻笨：馬交朋友，原來是自找的！