娥特早前喺答問大會發表民主派妒忌偉論，話議員投票支持財政預算案，等於批准收緊長者綜援後，呢單嘢不單辣㷫建制派，當日民主派入面，少數有份投票支持預算案嘅議員一樣㷫，好似有投支持票嘅資訊科技界議員莫乃光，噚日同傳媒茶敍時仲似餘怒未消，提早預告會喺即將發表嘅預算案讚多啲波叔，因為佢隨時會因為娥特嘅偉論，對預算案投反對票。
預算案冇100分唔支持
娥特話民主派妒忌佢見建制派，或者令佢爭取到建制派支持，但咁老屈民主派，就令莫乃光至今怒氣未消，佢自爆咁氣頂嘅原因，全因當日向特首辦爭取同娥特會面45分鐘，傾收緊長者綜援一事，一早話明會面時間仲可以遷就特首，即使朝早6點，甚至夜晚12點都可以。點知特首辦一味拖冇回應，其後更加只約見建制派議員，令佢覺得唔係見唔見問題，而係不被尊重。
莫乃光仲預告，稍後就預算案發言時要對財政司做嘅嘢讚多啲，因為最後佢可能投反對票，又話受娥特「提醒」，原來議員投票支持預算案，即係等同批准收緊長者綜援，咁佢就新一份預算案投票時，要佢支持預算案，就要先做足100分，99分都唔得，仲話因為特首水平好高，以後都要仿效娥特。睇嚟娥特呢次「直言」得食，但就隨時令到波叔當災。
李八方