摩連奴上個月被曼聯炒魷後，雖然暫時冇波教，不過佢都好多嘢忙。日前佢就去咗卡塔爾，參觀2022年世界盃其中一個場館嘅建築工程。當被問到未來去向時，摩佬就向大家大派定心丸，話唔會就咁收山：「我相信到2022年嗰陣，我會教緊職業球隊，到時我或者會因為班球員要喺季中參加世界盃而唔開心。」
至於摩佬舊部保羅普巴同尼曼查馬迪近日喺英國搭火車嗰陣，因為玩uno嘈得滯而向坐隔籬嘅阿伯合照道歉，不過尷尬嘅係個阿伯好似唔知佢哋係乜水，仲拒絕合照㖭，要普巴同馬迪求佢先「勉為其難」影相。就算事後阿伯個仔話畀佢知，同佢合照嘅係兩大曼聯球星，阿伯都相當淡定，真係哭笑不得！