立法會發展事務委員會噚日傾過有關新界東北發展嘅撥款申請，雖然最後未投到票，但係又引起一場被屈風雲。是咁的，民主黨林卓廷（圖）喺會上支持咗個撥款，之後瞬間被人屈佢昔日就反對、今日「竟然」支持，搞到阿廷大呼冤枉。
話說個會完咗後，土地正義聯盟出po譴責阿廷嘅支持，話民主黨曾「矢言反對東北發展」，到今日「竟然在會議上支持將（東北）撥款呈交工務小組」，之後仲話阿廷「已不只一次轉軚」，所以要強烈譴責。
阿廷就向八方伸冤，話網民「生安白造」，因為民主黨從來冇話過反對成個東北發展計劃，佢話「你幾時有聽過民主黨講不遷不拆先？唔好屈得就屈」。佢仲話，過去民主黨阻過撥款係因為政府未做好安置補償，所以投過反對票，而近年政府嘅補償方案喺各大黨派爭取下有改進，總算回應咗居民訴求，所以家陣咪支持，而且咁樣做係要平衡輪候緊公屋嘅市民同埋地區需要。其實阿廷都毋須太介懷，話晒選舉又近喇，好次今次咁嘅事可能陸續有嚟。