去年民主黨黨慶，特首林鄭月娥唔單止出席，仲要贊助3萬蚊畀民主黨前立法會議員李華明高歌一曲《笑看風雲》，事後娥特喺Ig貼相仲hashtag大和解，引嚟一場小風波。「活得開心心不記恨，為今天歡笑唱首歌」，今年娥特同肥仔明，再冇呢支歌仔唱，因為民主黨中委會早前決定，3月黨慶唔會請林鄭、律政司司長鄭若驊同立法會主席梁君彥，原來呢件事令包括肥仔明在內嘅老鴿有微言，肥仔明仲因此退出該黨嘅籌款委員會。
亂劃紅線或令高官卻步
八方聽聞，有民主黨老鴿認為以往民主黨黨慶拒絕邀請某位官員，「紅線」劃喺該黨有冇叫過該位官員下台，例如前特首梁振英、前發展局局長陳茂波同前教育局局長吳克儉，由於踩中該黨嘅「下台紅線」，未獲邀出席黨慶都好合理。但林鄭上台後，民主黨至今未叫佢落台，但中委會竟然作出不邀請林鄭嘅決定，據知令部份老鴿不悅，其中一直係籌款委員會主將、去年上台唱歌成功揼林鄭心口捐出3萬蚊嘅肥仔明，更決定退出籌款委員會。
八方向肥仔明查詢，佢證實退出咗籌款委員會，解釋民主黨做事，立場向來清晰，唔能夠將條「邀請官員」嘅線亂劃，既然意見不一就退出。
據聞有民主黨員擔心，若然唔請林鄭出席，就算林鄭唔似敵我分明嘅689咁下封殺令，娥班子高官若然收到民主黨嘅黨慶邀請，夠唔夠膽僭越阿姐出席先？而一旦「零高官」出席，或多或少對籌款成績都有影響！但有年輕民主黨人話，林鄭對進行議會抗爭嘅林卓廷同尹兆堅作政治檢控，邀請佢嚟嘻嘻哈哈，真係唔多適合，認為中委會決定合理。
李八方