立法會下周三大會討論政府提出嘅三隧分流無約束力議案，特首辦主任陳國基接連向各大政黨拉票，繼上周見咗民建聯，噚日再搵工聯會同經民聯，但多個建制政黨向陳國基送上大檸檬，表明難以支持政府原議案。政府議案要在席議員過半數贊成先通過，按目前形勢，方案過關機會唔大。
民建聯陳恒鑌話紅隧及東隧收費由20同25蚊激增至40蚊後，擔心效益不似政府預期，隨時分流不成反令三隧齊塞，表明無法支持現有方案，佢會提出修正案包括關注東隧及紅隧加幅過高等。工聯會陸頌雄亦話方案難確保分流效果，但巨額加費為消費者帶來好大負擔，工聯會難以支持，但未決定投反對、棄權定唔投票。
據聞有建制中人向特首林鄭月娥查問原議案有冇改動餘地？娥特「直言」冇。民建聯指地區反對聲音之大，立法會黨團都不能不循地區意見行事，形容兩大選舉當前，擔心議題會成對手攻擊把柄，故此未能冒險撐政府。至於提修正案係咪必然反對原議案？有民建聯預告「棄權都得㗎嘛」。陳國基拉票後見傳媒重申政府與西隧經長時間商討先制訂現有方案，硬銷方案好處，叫議員以香港整體利益為依歸，以手上一票代受惠市民發聲。