今季喺阿仙奴爭輸畀賓特尼奴、俾領隊艾馬利貶做後備門將嘅施治，唔知係咪踢到冇癮，星期二突然喺社交網站宣佈季尾掛靴，結束自己廿年嘅職業球員生涯。比起兵工廠，施治嘅前球會車路士就好識撈，據英媒透露，佢哋準備接觸效力車仔長達11年嘅施治，帶佢返史丹福橋出任宣傳大使或青訓教練。
暫時就唔知施治願唔願意接受車仔邀請，但係佢其實都好識為未來打算，已經報讀咗教練課程，希望未來都可以好似佢啲前隊友林柏特、泰利、馬基列尼或者舒夫真高咁，展開執教生涯。
其實，政府近日將長者申領綜援嘅門檻，由60歲提高至65歲，特首林鄭月娥仲解釋話自己家陣都做到60歲，日日返十幾粒鐘，相信65歲以下嘅市民，都仲可以自力更生咁話。睇嚟施治都好「認同」林鄭嘅說話，真係活到老做到老，盡量充實自己，好似施治咁，家陣結束球員生涯都係37歲，掛完靴仲有成起碼80年要過（勞工及褔利局局長羅致光話人可活到120歲），唔想晚年窮到燶，真係要為自己未來打算。
新舊戰友齊致敬
講真，施治真係唔使愁冇人搵佢，就算做唔成正牌領隊，都一定撈到守門員教練，單憑佢係英超有史以來不失球場數最多嘅門將（見附表），都夠晒說服力。當佢宣佈自己掛靴，好多前領隊同新舊戰友都有向佢致敬，好似泰利、杜奧巴、泰拔高圖爾斯甚至摩連奴，都話好榮幸可以同呢位咁偉大嘅捷克門將共事，就連另一位可以話係今代英超最佳門將、上星期幫曼聯險勝熱刺嘅迪基亞，都有喺ig上載施治入「廠」前兩季嗰件33號波衫致敬。
迪基亞要頂薪先留隊
至於迪基亞，近日據講佢同曼聯續約一事有眉目，皆因球會度過摩佬黑暗期後，家陣由蘇斯克查領軍一天光晒，願意留隊，前提係要求享有球會頂薪，超越阿歷斯山齊士嘅35萬鎊周薪。不過，佢家陣得20萬鎊周薪，突然要求加成倍人工，相信紅魔都要先諗清楚至決定。