星期二本欄引述電腦J話IT人才短缺，係有啲理據，佢呢位喺新亞主修人類學，做記者出身，居然也成為電郵系統專家，可見呢行幾咁缺人。當然，電腦J之成功，不是普遍現象，好似左丁山咁，天生科學盲，點學都學唔到IT嘅嘞。
電腦J話目前全球電腦黑客愈來愈多，極為猖獗，日日挑戰政府、大公司、大集團嘅網絡保安系統，偷取秘密資料食大茶飯，譬如國泰航空網絡失守幾百萬乘客資料外洩，畀香港人鬧到爆，但萬豪酒店集團一樣被黑客入侵，偷走四億五千萬個住客資料，可知世界級黑客無處不在；國泰航空失守，並非國泰特別水皮。萬豪收購Starwood之後，旗下五星酒店眾多，包括St. Regis、四季、喜來登、Westin、萬豪，旅行住酒店，入住萬豪集團嘅品牌酒店，有近五成機會。
正因黑客猖狂，所以網絡保安專家G先生約電腦J吃飯，經常臨時甩底，次次講抱歉。電腦J知佢生意太好，也不以為怪，因為試過有一次G先生覺得唔好意思，依約出席飯局，但臨時帶埋四個同事嚟，一路食一路打notebook，因為一個客戶嘅網絡正在被侵入，佢地要趕緊救駕喎。G先生入職大公司成立Cybersecurity部門，專為其他公司提供網絡保安服務，由三個人開始，三四年間已擴充至六七十人，不停招聘適合專才（最好係電腦數學雙主修，或主修一科副修另一科）。大公司二十四小時都會受到環球黑客垂涎，試圖攻擊，如G先生者，或可稱為現代保鑣，網絡保鑣也。
記得約十年前，在新聞週刊睇過一篇文章描述菲律賓馬尼拉為黑客溫床，菲律賓學生普遍英文水平好，讀完工專電腦科，搵唔到嘢做，住在貧民窟區嘅，往往鋌而走險，利用電腦知識去竊取信用卡資料做假卡去買貨（通常買新型電腦及軟件），再利用新電腦去搵食，累積經驗之後會被延攬加入黑客集團更上一層樓，呢類阿米巴式黑客集團今天更在東歐興起，又有間諜組織互相滲透，情報機關各取所需，點指兵兵，點指賊賊，根本分唔清是兵是賊，也不用試圖分得清楚；總之網絡保鑣就是24小時兵來將擋，水來土掩，疲於奔命。個人來講，亦防不勝防，電腦J上次去東京旅行，用信用卡購物，返港一落機已收到滙豐短訊：「你嘅信用卡在墨西哥刷卡，請確認！」電腦J立即否認，原來滙豐信用卡中心好有警覺，發現卡主剛在東京用卡，點解咁快就在墨西哥出現？所以實時通知電腦J。大家出外用卡，要高度警覺呀。