【黑鏡線索】
根據自己同認識嘅startup嘅經驗，創業時候，其中一件最估唔到難題，係當團隊由幾個人擴大到十個以上，原來唔可以用同一套模式運作。
估唔到，即係以為，要擴大團隊，單純係錢嘅問題。出得起錢請人就請得，請咗就人更多更好辦事。當然，都預咗人數加到咁上下，運作上大概需要調整甚至大改，但斷估應該係幾十甚至上百先浮現，點估到十鬆啲人，就已經爆炸。
爆炸，小爆即係多咗人之後，人均效率低咗，但至少總生產量上升，大爆就即係不單止效率低咗，係直頭低到總生產量不升反跌，甚至停產。
人多未必好辦事 懷胎必然要九月
點解人多唔係必然好辦事？一個原因，係因為分唔好工，或分唔到工同期執行，即係所謂一個女人懷胎要九個月，九個一齊懷胎唔會一個月就生到一個出嚟嘅問題。另一個原因，係溝通成本急升，高到足以抵銷多幾對手嘅好處。
好多時，startup剛開始嘅時候，係幾個人兄弟姊妹班咁組隊，本身已經認識熟落，而且一齊由零開始，經歷過一段日子，有啲事情，可以盡在不言中。呢個草創時候，大家忙於做做做，好正常，亦都唔會覺得溝通好大問題，如果三幾個人溝通有問題就真係好嚴重嘅問題。
到開始有錢請人嘅時候，就總會要喺外面請啲本身唔識嘅人入嚟，咁本來盡在不言中嗰套，就要改變。但好多時冇改變，係因為之前一直冇問題，就仲以為繼續咁落去都仲得，又或者以為一直冇問題，高估咗自己嘅管理能力，實情係不嬲冇乜管理能力，只不過以前有足夠走盞空間掩護住，所以唔覺。
而如果越請越多人，都仍然沿用舊嗰套模式，出事就只係時間問題，越請多人，越大鑊。如果請人嘅錢，係嚟自利潤，好多時利潤唔會一下子突然多好多，咁至少請人都比較有機會咁循序漸進，多啲機會喺請咗好多人之前，發現係時候要作出改變。
但如果加人嘅錢係嚟自集資，咁集咗資通常就會覺得投資者想你快啲動用啲錢，加上自己覺得終於有錢大展拳腳，就會暴發式咁喺好短時間之內請好多人，亦即係好短時間之內，本來成間公司大家好熟落，到忽然間互相好明白大家嘅人，變咗公司嘅少數。
系統化未必僵化 勿違初心變官僚
過咗短暫嘅蜜月期之後，問題開始浮現，例如開會多過做事，一件事要問幾手人都問唔出答案，生產力明顯下降，推新嘢速度仲慢過以前，CEO開始覺得唔對路。反應有幾種，一係就即煞停請人，檢討發生乜事，如果問題太嚴重甚至要減人。
另一種反應，係覺得既然人多咗，人均生產力降低可能係正常，惟有再請多啲人去加返快總生產，旁觀者可能覺得好好笑，但其實身處當中唔係咁容易睇得清。當然，喺一個本身唔夠穩固嘅平台上面，再冚多啲人上去，結果不難想像。
要減低溝通成本，一個方法係將事情系統化。但好多創業嘅人，覺得系統化等於僵化嘅官僚，而本身係非常討厭官僚，甚至係因討厭而離開以前嘅工作去創業，如果兜一個圈自己整返套官僚出嚟，實在係太諷刺，好違背初心，好怕同事話以前自由啲就好啦云云。見過有創業人做到自己都厭，就正正係因為喺呢個死結無間徘徊。
撰文：宋漢生