新民黨葉劉淑儀早前喺立法會一個委員會上，發火拍枱大鬧官員兼鬧爆領展，戲碼十足，幾間傳媒都報道葉劉拍枱鬧人。不過一直關注領展蠶食小商戶生存空間嘅立法會議員區諾軒，就大嘆傳媒只係關心呢類花邊新聞，反而好似佢呢啲認真關注領展議題，長期以來認認真真做領展嘅政策研究，卻無人報道！
嘆追問領展內容冇人報
區諾軒前日喺facebook以「拍檯走人金腰帶 政策研究收屍骸」發文，佢有感而發話，前日立會財經事務委員會討論《房地產投資信託基金守則》實施情況 ，成個議程只有佢、葉劉、郭榮鏗發言，但傳媒都報道葉劉拍枱鬧人，反而冇人報追問領展內容：「拍檯走人，真係好易……點樣先可以係一個議題做得好少少，公眾關心多少少。請教下大家，我下次喺會議廳做咩先好？除褲定裸跑？」佢表明，今次係不滿建制派講大聲少少，就可以見報。葉劉以往葡萄別人，如今終於可以被區諾軒葡萄。
區諾軒打領展堅係出晒名，未當選之前，佢已經多次踩上領展總部，為市民同小商戶同對方對質。今次佢趁立會討論《房地產投資信託基金守則》，呢個被認為係令公屋商場遭私有化嘅「核心惡魔」，要求當局修改《守則》，加入限制領展呢類基金拆售指定公屋物業嘅條款、禁止基金持有人拆售停車場車位、限制基金頻買賣物業，還公屋商場安樂日子。