在曼谷回港前吃早餐，順手拎一張中文報紙「世界日報」（台灣聯合報集團報紙）一看，睇到高雄候任市長（現已上任）韓國瑜與工商建研會成員見面時，竟然講到已停工嘅中油高雄楠梓煉油廠，佔地262公頃，可以考慮興建馬場，帶動賽馬產業鏈，提供新工作職位，並將派人到香港取經。
左丁山睇到呢段新聞，覺得呢位高票當選嘅候任市長，未上任已開空頭支票，頗為大口。唔通一朝得志便任性，噏得出就噏？台灣一向禁賭，地方政府（高雄市）點可以話解禁就解禁，開放賭馬呀？問過立法院未先？得到行政院認可未先？若以為自己受高雄市民歡迎便夾硬嚟，必定製造麻煩，失敗告終。無可否認，韓國瑜其志可嘉，立心拼經濟，但似乎有啲人治作風、自以為是，埋下凶兆。
講賽馬唔係唔得，只是台灣社會貪污風氣甚盛；地下賭盤多，由幫派操控，連選舉都可以賭一餐，若一旦高雄賽馬，賽馬結果唔正常，乃屬必然，有如數十年前澳門跑狗，一隻「神行太保」跑親都贏，令外圍恨到牙癢癢，呢隻名狗最後竟然暴斃在狗房，令到左丁山老竇從此不賭狗（那些年，旺角街頭有好多外圍檔口，警察視若無睹），澳門跑狗後來亦由盛而衰，卒之執笠收檔。高雄賽馬，肯定有人因利益關係搞搞震，令人見而生畏。韓國瑜派人到香港取經，相信係搵馬會教路，以左丁山愚見，韓國瑜不如派人到香港廉署取經，學習打擊貪污及利益衝突，內幕消息呢啲事情先啦，香港賽馬在業餘時代及職業化初期，你估賽事又好正經乎。
韓國瑜未上任便口出大言，香港律政司司長放假後在機場見記者，也口出大言，霸氣十足，令人見識高官真面目──自信自負，自己啱晒，自認有擔當──真真令凡人拜服。難得建制派搵到李慧琼等人護航，呢類人很自暴其短，唔怕畀專業法律界人士恥笑。大律師公會、律師公會夠專業喇啩，兩者一致認為鄭若驊出言不遜，違反律政司一向政策，有違公平原則，建制派律師謝偉俊都認為鄭司長係「眾人皆醒我獨醉」。
鄭若驊身為資深大狀（SC）畀行家咁樣批評，究竟仲有冇面？其他人講就話係將法律政治化啫，大律師公會主席（洋人）及律師公會主席（本地女性）唔通也將法律政治化？潘太唔好手指指呀！午飯時間見到已升上神枱為律師樓顧問律師嘅W先生，入行四十年，佢對潘太也不以為然，佢話潘太執業做慣民事（尤其是建造業）及仲裁（arbitration），對刑事法可能唔夠熟，與行家辯論刑事案處理方法，會佔下風，不過既然已登高位，可以打橫嚟講，法律界奈她何！