踏入2019年，各個球星都好似之前慶祝聖誕咁，開心放相上社交網站賀新年，兩大球王美斯同基斯坦奴朗拿度（C朗）年過三十之後，都開始變得好顧家，都係放同屋企人嘅相，但被譽為佢哋下任接班人、上個月先夠20歲嘅基利安麥巴比，就明顯因為後生鬥心足，喺除夕貼咗張舊相，但就用咗合成技術改圖，想證明自己先係新一代王者。
麥巴比上年威到震
麥巴比以前上載過呢張相，嗰時張相係自己細個趴喺張床度，牆上就全部都係偶像C朗嘅海報，但家陣佢又再po番呢張相出嚟，但唔同嘅係牆上嘅C朗海報，全部換咗自己喺2018年嘅威水相，包括捧走俄羅斯世盃、着住法國同埋巴黎聖日耳門（PSG）波衫慶祝入波嘅情景，仲有一張係佢登上《時代雜誌》封面嘅剪報，睇嚟好有自信喎！
麥巴比2018年認真威水，幫PSG成為法甲、法足盃、法聯盃同法超盃四冠王之後，再幫法國攞埋世盃，佢自己個人都贏咗高柏獎同法國足球先生，金球獎選舉又首次衝上第四，唔怪得佢都咁滿意自己上年嘅表現啦，但喺留言都附註對2019年好期待，亦不忘祝大家新年快樂。
意甲遲過法甲歇冬，C朗就要等踢完對森多利亞場波先有得放假，去咗杜拜過新年。佢喺除夕已經上載張船河照，佢同女友佐真娜坐喺架豪華遊艇度互嘴放閃，去到元旦，C朗就放多一張同佐真娜，仲有小C朗喺杜拜睇煙花嘅相，恭祝大家新年快樂。
C朗今年繼續「葡」
另外，據報C朗早前接受訪問，就話今年會重返葡萄牙國家隊，對於之前傳佢因為杯葛歐國聯，所以世盃後就再冇着上葡軍波衫，佢就澄清話一早同葡足總有協議，話呢下半年唔會出賽，咁啱得咁橋，美斯又話2019年會復出踢阿根廷國家隊，佢亦喺元旦上載一張享受緊天倫樂嘅相，同老婆、兩個囝囝一齊影全家福。