法甲歇冬，巴黎聖日耳門球星尼馬家陣就喺老家巴西放緊假兼養傷，不過近日佢就腳痕痕，搵埋三位名人一齊玩乒乓足球（teqball），睇嚟佢嘅傷都好番七七八八喇喎。
尼馬趁歇冬就飛咗返巴西陪屋企人，不過佢似乎就算放假，都離唔開足球，星期一佢就同幾個朋友玩吓巴西好流行嘅乒乓足球，而佢嘅對手仲係兩位靚女㖭。見到兩位靚女都同尼馬搓得幾板，原來佢哋係巴西嘅職業足排球球員嚟嘅，一個叫Natalie，另一個就叫Bianca，而同尼馬拍檔嗰位隊友腳法都唔差，原來佢係一位職業啤牌玩家，唔怪得巴西叫足球王國，真係人人都踢得吓！
PSG歇冬後第一場比賽就會喺法足盃64強對邦迪維，不過呢場尼馬就應該冇份踢，大家想睇佢表演最快都要等到下周中嘅法聯盃喇。