噚朝9點幾，陳先生喺圓方嘆緊早餐，突然聽到嘭一聲，走出去睇吓，見到有一架雙層城巴撞爛咗一塊3.1米嘅高度限制牌同埋路牌，卡住咗喺度。好彩架巴士寫住暫停載客，冇人受傷，警察到場調查。
架巴士沿柯士甸道西駛入高鐵西九龍站，陳先生估計佢行錯路，因為嗰度根本唔夠高畀巴士過。小記都去咗現場了解，現場消息話，嗰架空載巴士係去紅磡站，懷疑車長一時搞錯，駛咗入去高鐵站私家車上落客區。當時現場有保安員見到巴士駛緊嚟，已經即刻揮手示意，但說時遲那時快，巴士已經撞咗埋去指示牌。
意外之後，警察借用附近地盤鏟車，由工人叉高路牌幫巴士「鬆綁」。城巴發言人表示，肇事城巴係由機場去緊紅磡站，而車長喺2018年5月入職，入職後一向有揸機場路線，8月亦曾經駕駛來往機場至紅磡站嘅A21線。
港鐵發言人就話，現場係西九龍站喺連翔道上落客區入口嘅架空燈箱路牌，嗰位置淨係畀的士、私家車及小型貨車等車輛使用嘅入口，現場亦有標示指出設有高度限制。