噚日朝早9點半左右，林先生返工途中搭巴士去九龍塘達之路又一城巴士總站，點知有架專線小巴停咗喺巴士總站嘅入口，林先生落車睇吓乜事，原來有個天寒地凍仲着住短褲嘅男人喺嗰度過馬路，唔滿意小巴司機砵佢，要求司機同佢道歉，對方唔理佢，懷疑有人發爛渣將個背囊同行李袋掟喺小巴車頭，阻住其他車出入幾乎半個鐘。
冇人掂到 自行倒地
33歲短褲男報警，話佢過馬路嗰陣停喺小巴站嘅小巴砵佢，佢同68歲小巴司機爭執。當警察去到現場嗰陣，林先生影嘅片段見到短褲男拎返起個背囊同行李袋，小巴司機同行家好緊張走上去叫佢放返喺原位，有人好大反應即時跌落地下，小巴司機指住佢：「詐諦吖嗱，詐諦呀！」仲即刻同警察解釋：「我冇揩埋佢度呀！」
短褲男就同警察講，佢過馬路嗰陣小巴差啲撞到佢，跟住小巴司機講粗口鬧佢，所以佢先同對方理論。事件冇人受傷，最後雙方各自離場，警方將案列糾紛。林先生覺得司機響按只係提醒途人小心，認為有人小題大做。