下星期就係普天同慶嘅聖誕節，議會陣線一眾議員，包括Miss Mo毛孟靜、人民力量陳志全、朱凱廸，同埋今年新加入嘅新同盟范國威、區諾軒噚日同一眾助理、傳媒開P。
開P唔少得遊戲時間，作為召集人嘅Miss毛喺大電視環節似乎唔太在行，最終只係被估中三題，係咁多議員中最少，要被罰攞大利是出嚟抽獎。Miss毛把口唔服輸，但仍心甘情願拎出紅衫魚抽獎。
至於答問環節，大部份議員表現不相伯仲，惟獨一題得朱凱廸答啱，就係要喺地圖分辨交椅洲同坪洲，證明朱凱廸土地知識豐富。Party高潮當然係抽獎，由慢必送出嘅港版的士模型原本由之鋒抽中，但佢要同區諾軒去港鐵站視察提早走咗，於是大家決定將唔在席嘅佢DQ，重新抽過。亦有人發現朱凱廸放咗自己個名入抽獎箱，笑稱佢咁都同議助爭，幾乎要罰佢另外拎多1,000蚊出嚟抽獎。