【港情講趣】
現在還有幾多人看香港足球聯賽？早年曾出現「香港勁揪」熱潮，但冷卻之後，大家應該心裏有數；現在還有幾多人會花錢買實體雜誌？看到一本本經典雜誌停刊，更常常聽到甚麼「紙媒黃昏」。如果出一本九成內容講香港足球的實體雜誌會如何？
策劃復刊計劃的三位搞手說：「逆境波成日都有，我哋落唔到場踢，都要出書同香港足球打吓氣。」又啱，就是處於劣勢，才要打反擊！中年球迷，大概30幾40歲打後，會記得香港有哪本足球雜誌？《球迷月刊》總會有印象。1989年9月創刊，「細鬼」張志德做封面，到九十年代初停刊，1995年2月復刊成為雙周刊，1998年又再停刊。現在，《球迷月刊》準備再回歸，先以facebook專頁、YouTube頻道作先鋒，下年推出實體雜誌，最勁之處，是會延續《球迷月刊》傳統，九成內容關於香港足球。
終極目標 「想大家返球場睇波！」
訪問第一句，亦是最多人想問的一句：咁大膽？從事幕後製作的faifai說：「其實香港仲有一班香港足球嘅死忠支持者，我哋亦同呢班『黐線佬』一樣。講真，我哋一個星期最少睇兩場香港聯賽，真係睇香港波多過睇外國波，睇南華多過睇巴塞。」
負責編輯的江少則說：「始終有份情意結，你對上一位香港球星識得邊個？」陳七（陳肇麒）。「係囉，當年就係有一個好識包裝、宣傳嘅球會（南華）班主，羅傑承先生，但而家要喺球圈搵一個咁好咁有能力嘅老闆唔容易，我哋唔係班主，就出力喺傳媒方面，有人做總好過冇人做。」還有會在節目中出鏡的Roy，1987年出生的他說：「香港人，梗係想支持香港波，睇波聽見球員係中文名，感覺都親切啲，等於大家都想撐港產片一樣。香港有一樣曾經好有人氣好有地位嘅嘢，就算而家差咗，但作為真fans都想落力撐。」
訪問至此，應該開始明白他們的想法，很多事情不一定是賺錢為先。「暫時做網上版，成本未係好高，之後出書就希望可以做到收支平衡，講真，係有少少使命感。賺錢嘅話，我哋喺其他範疇嘅生意上面賺，應該會比較容易。」問到三位《球迷月刊》復刊的搞手今次最希望做到甚麼？不是銷量好，不是like數多，而是「想大家返球場睇波！」
粉紙彩色印刷 30年前賣10蚊本
說到我知道的香港球星陳七，江少說：「死啦，陳肇麒都33歲喇，你對上一位識嘅球星都可能就退休！所以我哋每期都會介紹一位香港聯賽新星，踢到好波嘅，畀個機會佢哋，希望多啲人認識。」在《球迷月刊》的facebook專頁看到，有香港球星支持，亦有香港漫畫家拍片撐，「講到足球嘅集體回憶，除咗打機有Winning同FIFA，我仲有甘小文嘅《至Goal無敵》。」47歲的江少從事出版業，認識很多漫畫家，亦認識《球迷月刊》的創辦人鍾可強先生。「復刊都係佢嘅心願，聽見我哋做嘅內容係以香港足球為主，佢就畀個名我哋用。其實《球迷月刊》好經典，當年係第一本用粉紙印刷兼彩色嘅足球雜誌，賣10蚊本喎，30年前賣10蚊本足球雜誌喎！情況有啲似你哋蘋果初初出嘅時候，第一次有全彩色嘅報紙，改變咗業界生態。我由第一期開始買，有齊全套。」訪問當日供拍攝的舊書，就是江少的珍藏。
江少的足球故事，由年輕時當漫畫助理說起，那時文化傳訊剛取得《足球小將》版權，亦有發行日本《週刊少年》的中文版，綜合漫畫周刊《EX-am》，他幫手把日本漫畫中的「擬音字」改成中文，再補回背景構圖，「有一次做《足球小將》，講小志強啱啱練成雷獸射球，背景係一隻雷獸，但隻雷獸被日文擬音字遮咗七成，我索性將隻雷獸重新畫過，之後梗係俾上司鬧，『高橋陽一嘅嘢你都夠膽咁搞？』不過當佢鬧緊時，其他同事唔知咁多已經fax咗去日本攞approval，可能因為係《EX-am》唔係單行本，冇咁嚴謹，又過到，最後仲出咗街。」
賭波不睇波 賭來幹甚麼？
為甚麼香港賽馬事業達國際水平，但足球比賽卻差得遠？相差的會不會是一個「賭」字？說到救市，《球迷月刊》復刊出力，但如果有得賭香港波會否是更有力的方法？faifai說：「香港人鍾意賭，有得賭一定多人睇，不過最緊要係馬會賺到嘅錢，可以放番落去發展足球，其實係好事。」江少說：「有邊一個發達嘅足球國家冇得賭波？呢個唔算係一個好冒險嘅方法，而家球市咁差，仲有得再差？乜都試吓，最低限度好過乜都唔做。」阿Roy則講出香港馬會、球壇最怕發生的事，「你驚有人打假波？其實係一個循環，多人睇多人識多收入，球員人工高啲，獎金又多啲，自然唔會為錢打假波。」
到時《球迷月刊》會有波經？「書刊內容未完全落實，乜都有可能加落去。」三人仍然強調：「但一定係香港足球為主導。」
「如果香港有自己嘅球星，球迷想搵佢哋簽名，可以攞乜去畀佢哋簽？而家好似冇乜選擇，到時我哋希望係《球迷月刊》。」的確幾熱血，熱血到我去畀個like，出書時一定撐，始終我也不相信甚麼「紙媒黃昏」。
採訪：陳孝義
攝影：劉永發（部份圖片由《球迷月刊》提供）