科技工業發達，會導致收入分佈不均，貧富更加懸殊，影響社會穩定性，呢種事情係經濟規劃、經濟計劃以前未有諗清楚嘅。此外，原來科技初創時會有大量競爭，但到咗後來，變成淘汰賽，有大食大，贏家通吃，最後變成壟斷性質，巨型科技大到不能倒，直至另有新科技產生，顛覆市場為止。壟斷嘅例子好多，例如Google一出，所有敵手垮台，雅虎威風無存，已面臨淘汰，fb一出，與佢競爭嘅My Space雖有梅鐸投資，而今冇人理，蘋果iPhone面世，日本瑞典芬蘭手機生產綫全部執得，只有同樣咁大嘅Google推出安卓系統，衍生三星、華為、小米等手機，先至形成二分世界；中國淘寶獨大，網購稱王，騰訊手遊威盡，亦是一樣。在科技工業世界，好似唔駛講自由市場競爭，通常係初創時，群雄並起，中段霸主湧現，最後產生始皇帝，統一天下，政府莫奈何！歐盟批評Google壟斷，最多係罰十億八億美元，或要佢交稅，但歐洲何來一家公司可與Google競爭呀。
正因為科技工業有此特質，中國華為崛起，西方（主要係美國，其他西方國家唔係嗰皮）震驚，歐盟管壟斷性谷歌，猶有西方法規可循，如果華為壟斷，歐盟就會手足無措，因為「華為」是一個中國集體主義經濟之下一個國企民企軍企混合體，唔上市，冇公開資料，全無透明度，歐美不知如何去規管。西方最驚華為率先設立5G世界標準，成為Google、微軟，一於贏家通吃，將美國嘅科技公司踢在地上。2017年華為之「流動基建設備」（mobile infrastructure equipment）銷量佔世界市場28%。首次壓倒瑞典Ericsson之27%，諾基亞23%，中興13%，三星3%，相信以後華為會將對手愈拋愈遠，令瑞典與芬蘭感到不安。無他者，若技術水平相同，質量相同，華為設備一定便宜過艾力遜與諾基亞，因中國工程師夠多夠低薪水也。
華為之技術從何而來？當初不出模仿偷師一套，到現在，華為之R&D預算在2017年接近140億美元，全球僅次於亞馬遜與谷歌，全世界排第三，而華為未上市，不用考慮股價，一味擴大R&D，發展自己技術，希望有獨創，有突破。咁鬼龐大咁有錢，華為是否已經煉成金剛不壞身，不日稱霸世界呢？一位曾在上海深圳工作嘅香港IT專家話畀左丁山聽：「華為之Achilles' heel就是芯片，目前仍然非常倚賴高通及美國設計芯片，華為自製麒麟晶片好倚賴外國授權嘅技術，主要來自HRM，美國一旦禁運，華為可能半身不遂！」