可能大家會嫌座落黃竹坑嘅港怡醫院唔就腳，未必留意佢嘅動向；之但係港怡除咗好多港大名醫坐鎮，原來膳食服務亦相當講究，主打星馬菜式如肉骨茶、喇沙、海南雞飯等，廚師要先去新加坡學藝。佢哋對食物嘅要求之高，連病房餐都唔係一早整定，而係「即叫即整」，確保嘢食最新鮮、最美味。
食物要求咁高質，主廚自然都唔失禮。有差唔多30年下廚經驗嘅盧國錦，做過九龍香格里拉同洲際酒店廚師，東南亞菜、西餐都非常拿手，佢話「即叫即整」就係當營養師決定菜單之後，一日病房未嗌餐，佢哋都唔會預先煮。箇中原因好簡單，「病人要住醫院已經好慘，唔食番啲好嘢點會開心？」
而噚日港怡醫院搞傳媒自助午餐，盧主廚自然都露兩手，精美嘅一口海南雞飯、迷你喇沙食到成班記者冇停口，連港怡營運總監邱家駿醫生都猛豎拇指讚喇沙冇得頂。