【add人物】羅傑承二女羅欣儀（Gloria）29歲前，學業順、事業稱心上揚，做過法律工作，之後返屋企打理家族生意。習以為常的工作狂，在29+1的「三字頭」關口爆破，壓力大導致免疫力差，皮膚血管難降溫，夏天塊面變紅番茄，自以為堅強的她跌落情緒幽谷，直至一次保加利亞之旅啟發，重新站起來接受工作新挑戰。
撰文：梁錦雯
攝影：林德雄
羅傑承二女羅欣儀（Gloria）三年前回到父親的公司打理家族生意，管理餐飲、拓展海外地產項目，現職執行董事。30歲、山羊座的她愛有理性、有條理規劃，十多歲去英國讀中學，大學讀法律，畢業回港在律師樓、NOW TV的Marketing工作過，儲夠經驗就嘗試挑戰自己。
畢業回港，Gloria從事法律工作時，有跟過大狀上法庭、處理物業文件、上市公司財務，過着「好充實」非人生活，似足無綫近日律師劇的小律師寫照：「我都好嚮往過律師劇嗰種生活，着靚衫，去happy hour，但時間係唔容許，有九十九巴仙時間擺咗喺做嘢，少咗好多朋友，會成日放飛機，就算10點都趕唔切同佢哋食飯，工作時間好長，長唔係工作至夜深，係工作到人哋起身返工時候，你先至係放。」
另角度學堅強
再外闖兩年後，Gloria終於覺得需要返屋企幫手，在公司浸了三年，Gloria自言追求有工作表現，成為爸爸眼中有能力的人，變成一個要求高、超時到通宵的工作狂，將自己拉得好緊。直到今年，即是29+1的一年就出事了，身體免疫力變差，皮膚血管出現問題，病情差時更牽連情緒。
Gloria說：「29、30歲係個好年輕嘅時候，對我打擊好大，我人生規劃上面，30歲係一個界限、35、40慢慢咁去，個病令到我衝刺緊要停落嚟，個病係唔識得控制自己，人哋熱時就好容易calm down，我就會變到一個紅番茄，最好朋友就係冬天同風扇，成日會收埋自己，情緒起落好大，負面情緒係好強。喺30歲之前，以為自己好堅強，乜都處理到，經過呢次，令我對堅強解釋有唔同，堅強唔係話係就係，唔係死頂就係，係要嘗試同感受你唔好嘅嘢，要去接受，𠵱家我講會笑，之前我覺得係好痛苦，𠵱家慢慢好番，都想快得嚟relax咁pick up工作。」
投資旅遊項目
放慢工作步伐，去旅行減壓思考人生，Gloria一次保加利亞之旅，令她重拾對工作的熱情：「最近再去呢個地方，算係一個深度旅行，去了解佢哋歷史文化，有玫瑰花、紅酒，佢哋全部食物都係organic，又有好多聯合國文化遺產，係出年歐洲文化之都，發展好有潛力，好多荷李活影片後期原來都喺嗰度做，自己都有一個idea出嚟，投資旅遊項目都係畀自己一個挑戰，想畀自己一個成績表，同埋畀公司、畀自己知道真正實力，都係一個幾大挑戰。」
在公司Gloria對着爸爸稱呼「羅生」、「老闆」，工作不達要求都要被「抦」：「我寧願畀佢鬧，好過你唔知道做得唔啱，一直錯落去。」在公司，父女無情講，回到家中，鐵漢外表的羅傑承原來是個暖爸，在她心目中是個二百分的人生偶像：「私底下係個爸爸version暖男，將家人擺第一位，好重感情，好細微嘅嘢記咗喺心，好似家姐結婚，佢會做一個video，入面寫嘅嘢講佢心裏面對我哋感情，點care我哋，聽到嗰刻會好感動。」
更多精采時尚內容，盡在 http://add.appledaily.com。