曼聯又嚟喇？《ESPN》引述消息人士報道，話曼聯下年夏天將會去澳洲踢季前賽，另外亦盛傳紅魔會訪問香港同日本，紅魔仲會喺今個禮拜稍後時間正式公佈。報道話，曼聯將會喺下年7月喺澳洲珀斯為19/20球季進行備戰，屆時紅魔會鬥另一支英國球隊，仲話可能係家陣喺英冠踢得唔錯嘅列斯聯，同埋澳職球隊珀斯光輝。曼聯亦好可能喺今次東征順道去埋香港同日本，不過球隊實際出訪日期同埋地點，就有待今個禮拜較後時間嘅官方公佈。
曼聯喺過去5季，有4季嘅季前賽都喺美國上演，摩連奴喺2016年首季領軍嗰陣，就曾經帶隊去過中國。當時紅魔喺上海嘅首場比賽就慘輸多蒙特1:4，下一場原定喺北京鬥曼城嘅比賽，就因為鳥巢場地惡劣搞到取消。不過呢刻曼聯去上海同新加坡嘅機會其實就大啲，香港就真係微嘅，聞說戲金太貴好難計數喎，拭目以待啦。