前幾日去咗巴布亞新幾內亞出席亞太經合組織2018領導人非正式會議、前晚先返港嘅特首林鄭月娥，昨早會見傳媒時自動波為自己埋單計數，話呢次出訪已經係佢本月第四次出訪，上任至今則有30次以上外訪，訪問過超過10個海外國家同多個內地省市。
娥特話出席完今次會議後，今年嘅外訪活動已經完結，除咗下月要去北京做年度述職，佢話述職後「都希望可以爭取有幾日可以休息一下」，仲預告出年外訪工作，相信同今年一樣咁頻密。
美國國會最近先至發表報告，指北京持續侵蝕香港政治制度，咁究竟娥特頻頻外訪推銷香港，實際上有冇用？八方相信至少娥特自己覺得有成效，因為佢形容自己呢啲頻密外訪「對香港非常有裨益」，可以對海外政府解釋香港回歸21年來，「一國兩制成功落實，香港能保持我們的獨特優勢」，以及「加強香港海內外聯繫，提升香港作為一個國際都會的地位」云云。唔知娥特出年會唔會考慮訪美，親自向國會介紹香港嘅情況？