北大嶼山公路前晚10點幾發生驚險交通意外，當時一架市區的士向機場方向行緊，到小蠔灣對開時，收唔切掣撞向前面一架電單車，撞到車上兩個同樣21歲嘅南亞裔司機同乘客飛起，要由救護車送去醫院。
讀者潘先生事發時揸車經過上址，根據佢提供嘅車Cam片段，見到肇事的士沿中線行駛，前面電單車較慢，的士懷疑收唔切掣，一嘢炒落電單車度，令佢翻側喺地上打圈刮出火花。鐵騎士同乘客即刻被拋起再墮地，分別跌落慢線同中線。
及時坐起 執番條命
同一時間，肇事的士被尾隨另一部的士撞車尾，好彩乘客及時坐起身，否則恐怕被的士輾過，而鐵騎士亦反應快企起身走向路邊安全位置。潘先生表示，佢當時見到情況立即停車，並詢問兩名南亞傷者需唔需要協助，但對方表現驚慌未有回應，加上言語不通，而且兩人並無大礙，佢就離開現場。兩事主手腳受傷，事後送院敷治，警方正調查車禍成因。