話說大導演張堅庭早排因為睇睇吓族譜居然認返個堂叔，即係港大法律學院首席講師張達明，咁近城隍廟，梗係求返支好籤啦，而且法律題材電影，電影一向少，所以張大導噚日趁張達明出庭打官司跟埋去觀摩下，順便攞下靈感。
單案係一宗裁判法院上訴案，上訴人盧建新係一間食店老闆，舊年俾法庭裁定喺舖頭襲擊嚟巡查嘅環保署職員罪成，判監但畀佢緩刑，佢堅持自己清白，所以搵咗港大張達明幫手，張達明認為有得打，於是義務協助盧先生上訴。
張堅庭噚日坐喺庭度聚精會神聽審，聽完仲同堂叔同埋佢班學生入房討論，似乎收咗唔少料。佢同八方講，今次唔係第一次去法庭索料，拍電影《古惑大律師》嗰時都取過經！嘩，起碼28年前嘅事喎。
話法律義助服務係好題材
張堅庭話佢同堂叔相認後，知道原來港大法律學院有個義助服務，「一個教授帶住班學生上庭幫人」，認為係個好好嘅電影題材，所以去聽。咁張大導會唔會搵堂叔粉墨登場，幫佢度身訂做角色？張大導聽完八方個問題，居然淨係笑笑口望住堂叔唔出聲，唔知度緊點說服堂叔演出，定係構思緊個人物性格呢？
李八方