近月睇蘋果星期六、日副刊，有一位「客座」作家，叫做潘東凱，有時出專文，有時代梁文道出現，寫親都係長篇大論，但都幾好睇噃，有料到。一位朋友讀者問左丁山：「呢位潘東凱邊度爆出嚟㗎？」朋友問啱人嘞，左丁山梗係識得潘東凱啦！1999年時候，大家都曾在都爹利街嘅寫字樓單位（現時摩登名稱叫做WeWork或者Co-space）一齊工作㖭，不過佢搞投資，左丁山搞獵頭公司啫嘛。潘東凱係新亞師弟（81市場學），本是外滙專家，出身於滙豐炒房，後在CIBC，美銀、瑞銀工作，先後到過倫敦、蘇黎世、東京與世界一流外滙交易員交過手，所以左丁山一向同佢講經濟、外滙，勢估唔到佢一在蘋果登台，就專寫香港歷史，為之愕然。
蘋果有報導潘東凱與另一位新亞師弟歷史系劉細良有版權費爭執，事緣佢寫咗一本《炎黃解毒》，由劉細良間公司出版，但至今未收過版稅；新亞師兄弟可以講數嘅啫，點解要上法庭呢？以此問潘東凱，佢回應話：「多謝師兄關心，此事已進入法律秩序，不予置評。」
既然如此，再無謂多口，問佢有乜新搞作，佢話：「我自金融界退休後，可能受新亞文化影響，愛讀歷史書，唔敢話學錢穆先生咁研究中國歷史，但係對香港歷史愈讀愈有興趣，為之着迷，今年七月又出版一本新書，叫做《今昔維城之帝國英魂卷》。」
不數日，潘東凱送來這本新書《今昔維城》，共六章206頁，由三次坊出版有限公司（Cube Publishing Ltd）出版，以他的獨特眼光，重新檢視香港歷史。據他的描述，香港自割讓給英國後不久，人口便急劇膨脹，大多來自廣東鄉村，可說是經濟移民，來港尋找更好的生活，這個趨勢大致上百多年來不變，香港從來都是內地人嚮往的地方，今日香港人的祖先絕大部份都是來自廣東的移民，今天反移民配額的人士不如查查家族史，自己曾祖父從哪裏來，到了19世紀末，香港已成為一個英國人治下的cosmopolitan city，各式人種和平共處一城（維多利亞城），巴斯人、猶太人、阿拉伯人、印度人，當然還有不少英國人，皆來香港經商，與來自廣東的香港居民和平共處。在這樣的環境下，華人第一位精英人物何啟醫生／大律師成為先驅人物，與康德黎醫生（孫文老師）創辦香港華人西醫學院（香港大學前身），成為港英政府的重要華人代表。何啟（1859-1914）原來當年曾經在德臣西報（China Mail）與曾國藩弟弟曾紀澤有筆戰，曾指中國有洋務運動，整頓國防，將走上強國之路，何啟則指滿清貪腐藐視法律民權，空談洋務，必無所得！百餘年後，重溫這段歷史，港人與京師要人，有同樣分歧。