國泰航空爆出史上最大宗客戶資料外洩事件，涉及940萬人嘅個人資料喺未經授權下被取覽，唔少立法會議員都係國泰全資擁有嘅亞洲萬里通會員，隨時身受其害，不過班議員反應各有不同，有人急急改密碼，亦有人以佛系心態面對，等國泰方面正式通知先算。
佛系區諾軒：早有準備
好似身兼資訊科技事務委員會主席嘅民建聯葛珮帆咁，佢自稱係「900幾萬之一」，雖然未收到國泰通知，但都緊張話要改密碼，睇返有冇登記過信用卡資料。佢黨友鄭泳舜、周浩鼎同民主派專業議政梁繼昌、議會陣線區諾軒等都係馬可孛羅或亞洲萬里通會員，但全部未收到國泰通知，亦未知有冇受影響，不過周浩鼎同葛博士一樣，已立即改賬戶密碼以防萬一。
至於民主派議員呢？區諾軒就相當豁達咁話，擔心就梗係擔心㗎啦，但冇得驚咁多，佢亦唔打算改密碼，事關佢認為自己都算係公眾人物，對於資料外洩呢回事，佢早就有心理準備，只能夠期望國泰快啲處理好呢單嘢。除咗議員，八方噚日係立會見到政制局政助吳璟儁，梗問埋佢有冇中招？佢話自己係亞洲萬里通會員，睇聞覺得好驚訝，但冇主動改密碼，而佢信用卡亦冇被盜用情況，所以唔太擔心。
李八方