一般立法會議員嘅工作報告，排版通常四四正正，內容沉悶冇乜驚喜，但社福界議員邵家臻噚日向傳媒派發嘅任內第二份工作報告完全相反噃。舊年份報告走文青風格，今年阿臻就搵咗設計師設計佢嘅嘜頭做封面（圖），笑言過程同設計師爭拗多次，最終唔按設計師嘅「美圖」建議，堅持喺嘜頭加返虎紋同皺眉頭，唔少行家睇完都覺得真係幾似真人噃！
除咗封面得意，報告排版都好特別，唔係按工作時序，而係按一系列關鍵詞排版，包括「DQ」、「加會」、「道具」、「挑機」等。每個關鍵詞除咗有粵語注音，仲有造句示範，例如「加會」就係「個個月都加會，有無咁多會開啊？」阿臻解釋，呢句係佢主持社會福利事務委員會時立會秘書處職員經常問佢嘅問題。至於「道具」嘅例句就係「邵議員，你怕唔怕道具遮住你個樣啊？」原來呢句嚟自建制派議員謝偉俊嘅「溫馨提示」。
下月上庭 提早製作
議員一般只會任期第一年同最尾一年出工作報告，但由於佢嘅情況比較悲情，下月25號要就佔中案上庭，唔知仲可以留喺立法會幾耐，所以決定提早製作埋呢本工作報告先。