元朗富來花園噚日下晝1點幾發生傷人案，有個56歲姓李嘅男人喺停車場突然俾人用玻璃樽扑到頭破血流，要由白車送院。個兇徒事後走甩咗，但事主話唔知乜事，警方仲查緊犯案動機，追緝緊兇徒下落。
現場位於媽橫路7號，喺西鐵朗屏站隔籬。事發時市民林先生行緊去搭西鐵，其間西鐵站好多人圍觀，佢就望到男傷者倒卧喺富來花園停車場。林先生形容當時覺得好恐怖，見傷者流到成頭、成身都係血，連個袋都有血，聽街坊講話個傷者好似係攞車時同人發生爭執。
由於現場停車場係私人地方，林先生同其他乘客都入唔到去幫手，好彩之後有警員同救護員趕到。警員喺現場調查就話，事主報稱俾人爆樽受傷，但事件原因不明，佢送院時清醒。案件列作襲擊致造成實際身體傷害，暫時未有人被捕。