港珠澳大橋開通儀式噚日喺港珠澳大橋旅檢大樓舉行，平日甚少主動走到採訪區受訪嘅一眾獲邀「貴賓」，噚日朝早竟然主動頻頻捉住記者唔放手，其後更罕有集體一排接一排現身採訪區，鞠躬致謝後離開，唔睇真啲，真係會懷疑自己係咪時運高去錯地方？
原來呢啲「異象」出現，只因呢個有習大大出席嘅儀式，保安極為森嚴，一眾貴賓除咗要晨早6點半全部現身，一個個乖乖咁喺酒店進行安檢，儀式進行期間，更連手機都唔准帶入場，所以惟有靠捉住攝記幫佢哋影相，又或者一排接一排走到採訪區，希望記者幫佢哋影相留念。
除咗影相安排有靈堂feel，現場一眾貴賓入座時，由於全部要跟大會指定座位坐，現場800個座位上，都打直咁寫上一眾賓客中文名（圖），有現場傳媒行家就笑言，好有清明拜山感覺嘞。