過去為香港社運界出產過唔少猛將嘅學聯，原來不知不覺已成立60周年（圖），今年一班好有心嘅「老鬼」，就成立咗個「籌備委員會」，準備下個月4號晚搞返個「學聯60周年晚宴」敍舊，歡迎現任或曾任學聯嘅職員、學聯各院校代表團嘅成員、學聯屬下嘅委員會成員，以及學聯成員院校學生會屬下組織嘅友好出席。
有份發起呢個晚宴嘅學聯「老鬼」就話，學聯喺香港過去幾十年急劇社會變革中，扮演咗積極參與者嘅角色，相信今後各大專院校學生，可因應各自判斷去定義學聯喺當前形勢下嘅合適角色，今次晚宴就可以畀唔同年份嘅學聯「老鬼」同現莊聚首一堂，作為促進學聯重新上路嘅第一步。有興趣報名嘅學聯「老鬼」，可以去以下連結報名 https://goo.gl/forms/ixsXK6RouNzVEYFH3。