港珠澳大橋通車啦，人工島飄移唔需要理、大橋用量低冇所謂，最緊要係習大大南巡嘅時候，有條橋畀佢睇到、行到吖嘛！身為全國政協副主席嘅梁振英心情就好複雜，佢似乎好怕冇人記得起港珠澳大橋佢都有份提出，但佢又相當興奮，開心到喺facebook出po，話遲吓要帶同學仔去睇珠西㖭，究竟689又想搞乜鬼？
回帶睇一睇，689其實都幾慘慘豬，話說提出起港珠澳大橋嗰陣，佢未做特首；到條橋起好喇，佢又已經唔係特首，冇得獲邀與習同行，只可以排喺林鄭隊尾。唔……有乜方法可以扯上關係，畀習大大知道佢都有功勞呢？689真聰明，就係講舊時！
嗱，啱啱好成個星期冇出過po撩交嗌嘅689，今日喺fb出po，憶述三十幾年前佢就坐船由深圳去珠海講書，而回歸前嘅香港特區預備工作委員會同埋籌委會，其實都傾過起呢條橋連接港珠澳。點解無厘頭要提呢兩個委員會？可能因為689都有份囉。
「當日夢想 今天成現實」
跟住689仲話經過大家共同努力、克服種種障礙，「當日的夢想今天已經成為現實」，就連香港人嘅天空都越嚟越闊，所以佢牽頭成立嘅大灣區香港中心，準備組織啲校長、老師及同學「走大橋，看珠西」。至於睇乜珠西呢？係睇珠西交通樞紐、抑或佛山個珠西機場、定係唔知佢搞乜嘅珠西呢？八方當然唔知，只能學唐伯虎老竇問一句：搞乜呀朱茜？
李八方