政府用《社團條例》取締提倡港獨香港民族黨後，好多人都擔心呢個先例一開，日後會唔會講港獨、學術研究港獨都要拉要鎖？有啲建制派就話呢啲說法只係民主派危言聳聽，不過工聯會會長吳秋北日前就親身向市民示範，即使寫「民族黨」三粒字，都係十惡不赦、要拉要鎖嘅行為，民主派擔心完全唔係冇根據。
聲稱「好嚴重」 逼主持人換字
話說香港眾志日前將一條片上傳至社交網，其實係吳秋北、立會議員何君堯、公民黨主席梁家傑同眾志秘書長黃之鋒上星期三上now新聞台節目討論取締民族黨，片入面見到梁家傑話取締民族黨威脅港人結社言論自由，主持人於是問吳秋北認唔認同，點知吳秋北好似上身咁，先叫主持人表態係咪反對港獨，之後又話節目入面背景有「民族黨」三粒字，呢個係好嚴重嘅問題，仲話如果主持人唔講係咪反港獨，就冇得討論落去，最後終於逼到now新聞台換走「民族黨」三字。