出席V先生飯局之後，先在IFC商場行一個圈，然後落返干諾道中，在幾處地方遇到不少玻璃碎，相信係山竹衝擊中環寫字樓之遺留物，小G弟弟揸車在深水灣附近爆胎，就係唔好彩車過路上一堆玻璃碎所致，呢排行路，揸車都要特別小心，至怕防不勝防啫。
行經農業銀行，馬會投注站後就到咗蔡和平之A La Bakery一望，呢位仁兄又係坐鎮店內噃，於是同佢打招呼，佢點都要左丁山坐低飲杯茶，試食佢嘅特別「月餅」（法國上等麵粉用Perrier水混合製成之奶黃，柚子奶黃、黃金奶黃、伯爵茶奶黃及四川辣味奶黃幾款月餅），食吓又幾新奇得意，味道上佳，可稱之為the alternate mooncake。羅拔剛自印尼回來，佢話在耶加達開設燒鵝店（與甘建成兒子合作），營業額非常滿意，順道與朋友去一個私人小島釣魚打獵，捉到一隻大如三個拳頭合埋咁大嘅活蟹，香港未曾見過，印尼有不少海島根本完全未開發，在島上捉到巨蟹，係因為在城市見得太少而已。
拜拜之後，行到中環中心，見到廠家L走去停車場攞車，順便問佢內地工廠有冇受到特朗普貿易戰影響。廠家L大嘆：「多得特朗普唔少啦，自從四月佢展開貿易戰以來，美國買家怕交關稅，逐漸減少訂單，將訂單轉去越南等地區；我公司今年訂單比去年少咗六成！」唔係呀，咁緊要？廠家L說：「有少冇多，真係六成，偏偏內地今年不斷施壓，要嚴厲執行為工人買社保，完全唔畀走盞──即使以前十個工人買一個，後來要我地買足十個，按最低資工計，但現時又改為以實際工資計，咁就死得啦，我五年前有幾千工人，現在減到七百個，每人平均買社保一千元，一個月就要七十萬之元人民幣現金，遇上訂單銳減，你話點做。」聽佢咁講，真係弊喎，如何應付？廠家L話：「過去風光，使大咗嘅老友，紛紛結束營業，走得就走。我與拍檔叫做克儉克勤，以前有餘錢就在深圳買樓，呢兩年來多得樓價升咗唔少，賣咗三間，至今還有錢頂住，畢竟自己真係唔捨得盤生意，但如果要再賣多兩層樓來應付，我都要裸退咯，跟你左丁山去馬場小注怡情好過！」哦，馬場常見嘅另一位廠家馬主都係咁樣呻過，廠家馬主講過，一年後貿易戰及內地「萬稅」不改嘅話，佢都會舉手投降，讓內地啲沙膽民企去用中國方式搶晒啲生意囉。至於何謂中國式，你懂的。