基斯坦奴朗拿度（C朗）喺對華倫西亞嘅歐聯賽事領紅牌之後，佢嘅祖雲達斯隊友安利簡恩就開腔力撐，點知得罪晒全世界嘅女人。話說安利簡恩賽後接受訪問時就話︰「咁都要紅牌？我聽講C朗係因為扯對手頭髮而被罰，但我哋唔係女人囉。」結果當然係畀人鬧到儍啦，意識到自己「出事」之後，安利簡恩就透過個人twitter道歉，話自己只係想支持C朗，無意貶低女性喎。