深水埗添好運（福榮街9號）一經米芝蓮品評，成為名店，顧客源源不絕，香港IFC機鐵站之添好運亦是貨如輪轉，每天生意興隆，午飯時間，門外人龍長又長，左丁山每次幫襯添好運，都揀在下午二時後，到IFC店買外賣，拿回寫字樓吃個飽。醒目聰明如蔡和平，眼明手快，比其他人行先十步，老早與添好運老闆「培哥」達成協議，組成公司在東南亞搞特許經營，果然是一條財路，最近聽到傳聞，已有國際飲食集團收購蔡和平的合組公司，呢鋪真係發達咯！廚師老闆憑手藝發大財，羅拔蔡哥哥則憑眼光與經營手腕可賺得一大筆。左丁山三十幾年前做過直接投資基金，知道一個套現之最佳途徑就係賣畀國際集團，羅拔哥今日未賣，明日還是要用此方法。
點心師傅有如此脫胎換骨之生涯轉變，頭腦殊不簡單；最近進入月餅季節，在地鐵站睇見一位據稱在半島酒店創製奶黃月餅嘅師傅已經跳槽，在新字號推出奶黃月餅，一位吃過添好運點心嘅老友講：「咦！呢位師傅會唔會步添好運後塵，大發特發呀？」其實幾難講，廣東點心全年全日可食，長賣長有，月餅則只係每年一造，農曆八月一過，邊度仲有人食月餅呀，而且現在講衞生講環保嘅團體年年出來「倒米」，為月餅做de-marketing，嚇到不少人戒吃月餅㖭，你估個個都係左丁山呢類「吃月餅敢死隊咩」！
呢日早上，記者小G見左丁山吃雙黃蓮蓉月餅做早餐，大驚失色，猛叫「唔好呀！」其實係一個迷你月餅啫，駛乜咁驚呀，年青時直情吃一個正宗雙黃蓮蓉都面不改容。小G猛咁嘆氣話左丁山唔健康，其實每年左丁山都在農曆八月試圖吃正宗月餅，今年奇華推出迷你蛋黃椰絲蓮子月，一啖一個，十分過癮，誰知孫女亦想食，走來搶吃，於是想起孫女或者不宜吃傳統「雙黃蓮蓉」，一於畀佢食奇華之蜂蜜奶黃月，松子蜂蜜奶黃月，孫女歡喜到跳起。兒子記得去年食過伯爵茶奶黃月，家中搵唔到，要去買一盒喎！駛唔駛呀，叫佢食金華火腿五仁月算啦！人老咗，吃五仁月別有滋味，年青一代或者鍾意奶黃更多。蔡瀾監製之泡泡月餅，五仁月好正，配泡泡茶無以尚之，吃月餅配濃茶最合傳統，配可樂就無助消化及去肥膩嘞！香港製造月餅，雖然貴啲，勝在貨真，大家放心食用，去年有幾位客戶送禮，加埋十盒八盒月餅擺在公司，無人吃用，嘥晒，點解？你懂的，Made in China囉。